انت عامل زى حريم الجنازة.جملة كتير مننا بنقولها وبيكون اللى بنقصده من وراها انه شغال يرغى ومابيسكتش و لفظ حريم الجنازة دا تسمعه اكتر فى جنوب مصر.
مين هما حريم الجنازة؟
حريم الجنازة دول مجموعة من النسوة اللى بتلقيهم فى كل جنازة المفروض انهم بيجو عشان يقدموا واجب العزا فى المتوفى لأهل بيته وهنا تبتدى المتناقضات،
الوحده منهم أول ما بتيجى داخل الجنازة ومن بداية الشارع أو من قبل ما تدخل المكان اللى معمول عشان يقعدوا فيه وياخدوا واجب العزا تلاقيها ترقع بالصوت الحيانى وهاتك يا صراخ وعويل على الميت لدرجة تخليك تقول ان اللى مات دا من بقية عيلتها،بالنسبه للصراخ والنواح على الميتكلنا عارفين ان الشرع حرمه وفى أحاديث عن الرسول(صلى الله عليه وسلم) بتنهى عن الكلام دا وبتصف اللى بيحصل دا بإنه دعوة من دعوات الجاهلية،بس لو جيت تقولهم الكلام ده عين ماتشوف الا النور الكل يغلطك اللى يقولك لو مصرخناش عليه يبقى كإنه مالوش أهل ومالوش عِزوة ولو مصرخوش عليه كده يبقى الميت مات فطيس والناس تاكل وشنا وياسلام على حكاية الناس تاكل وشنا هاتلاقيها تتقال فى أى موقف طب وهو أنا عشان أرضى الناس أعمل حاجة الرسول(عليه الصلاة والسلام) نهانا عنها؟ يقولولك إحنا لقينا أهلنا بيعملوها،طب هو أى حاجة لقينا أهلنا بيعملوها إحنا نعملها؟هنا يتقلب الكلام على انك قليل الأدب ومش متربى وخد عندك شوية جمل بتطلعلك من تحت الأرض تخليك تلف حوالين نفسك.
بالنسبة بقى للى بتيجى وتجامل مجاملتها بتكون بكام صرخة كدا من اللى قلبك يحبهم الصرخة الواحدة تجلجل فى الشارع من أوله لأخره فى فكرها انها كده باللى بتعمله دا بتجامل أهل الميت وبتشهل الميت بمجرد ما يطلع الكَرَب (اللى بيتشال فيه الميت) من البيت تلاقى الصراخ والعويل ابتدا وكل واحدة من حريم الجنازة بتبدع فى اللى بتقوله من عَويل و نَدب،وكل دا بيخلص بمجرد ما يروحو الجَبانة (المدافن) ويدفنوا الميت ويرجعوا بيبتدى الجزء التانى من شغل حريم الجنازة تلاقى كل مجموعة منهم واخدينلهم جنب وهاتك يا رغى وكلام فى كل حاجة وأى حاجة من سيرة الخلق لبرامج ومسلسلات وحاجات تانية كتير.
ووقت ما تسمع صراخ من جديد تعرف ان فى حد لسه واصل الجنازة بكيسه ولازم يجامل والمجاملة هنا بتكون بالصراخ والندب.
عايز أقول إن العادات والتقاليد مش كلها صح ومش أى حاجة كان أهالينا زمان بيعملوها هاتكون صح 100% ودا دليل على كلامى وربنا يصلح الحال.
