الدستور والمواد المكملة للدستور

(تم كتابة هذه التدوينة فى 14/12/2012 الساعة 11 مساءآ)

تخيل كده إنك إنت وإخواتك كان ليكم قطعة أرض متاخدة منكم وفجأة رجعت لكم الأرض دى من تانى وأول ما جات قمتم حاولتوا تبنوها فالأول حاوطتوها وقمتم بنيتوا فيها عمدان وبعد فترة جيتوا تكملوا بناها وهنا إختلفتوا  فى اللى قال نبنيها بيت نعيش فيه وفى اللى قال نبنيها عمارة تتقسم علينا والزيادة نأجره وفى اللى قال نبنيها محلات ، قطعة الرض دى واللى الكل مختلف عليها هى مصر وإنت وإخواتك الشعب واللى رجعلكم الأرض اللى كانت متاخده منكم هما الشهداء اللى سقطوا فى ثورة 25يناير اللى ضحوا بحياتهم عشان أنا وانت نعيش حياة كريمة.

العمدان اللى اتبنت فى قطعة الأرض هى الدستور اللى هو عبارة عن مجموعة مبادئ وقواعد وأسس بتبين وتوضح نظام حكم الدولة والسلطات وتقسيم السلطات.

أى حد فاهم قانون كويس أو حتى بيقرأ عن الدساتير هارعرف غن الدستور بيكون عبارة عن مواد أو مبادئ عامة بتحتاج للتوضيح وهنا بيجى دور المواد المكملة والمفسرة والموضحة للدستور والمواد دى مابتقلش أهمية عن مواد الدستور نفسه غن مكانتش فى بعض الأوقات أهم منه لأن الدستور مش بيفسر مواده هو بيتكتب بشكل إجمالى وبشكل عام مش واضح والتوضيح بيكون مهمة المواد المكملة للدستور عشان كده تلاقى أغلب مواد الدستور فى أخرها جملة (وفقا لما ينظمه القانون او على النحو الموضح بالقانون).

دا مش معناه ان الدستور مش مهم  لأ أهميته بتكون فى إنه الأساس اللى عليه بيتم وضع القوانين اللى بتفسر المواد المذكورة فى الدستور اللى بتوضح نظام الحكم والسلطات وطريقة عملها.

وعشان كده بنقول زى ما الدستور مهم القوانين المكملة للدستور مهمة بنفس درجة أهمية الدستور فا زى ما بناخد بالنا من الدستور ومهتمين إننا نفهمه ونعرف المواد اللى بيتكون منها لازم ناخد بالنا من المواد المكملة للدستور ونعرف هى بتتكون من ايه.

مشروع فكرة

كتبت فى التدوينه اللى قبل دى عن انى هابتدى أكتب عن الحدود فى الشريعة الاسلامية وانى هاخصص تدوينة عن كل حد من الحدود،لكن للأسف إنشغلت فى مشروع تانى لكن اكتشفت انه ممكن يكون ليه علاقة بنفس مشروع فكرة التدوين عن الحدود، فبدل ما هايكون المشروع هو التدوين عن الحدود فهيكون مشروع كتاب إليكترونى عن الحدود.
الكتاب هايكون إسمه:
الحدود:ماهى؟أدلتها؟شروطها؟وكيفية تطبيقها؟
حاليآ انا فى مرحلة جمع المادة العلمية للموضوع،وان شاء الله قريب جدآ الكتاب هايكون خلص وجاهز للقراءة.
الكتاب هاينزل ضمن مشروع مجموعة حروف للنشر الإليكترونى.

سلسلة الحدود

حاليآ بنسمع كلام كتير عن تطبيق الشريعة الاسلامية ،انا لو هاتكلم عن الشريعة الاسلامية مش هايكفى تدوينة أو حتى كتاب أو موسوعة الشريعة الاسلامية عبارة عن بحر او محيط من العلم محدش يقدر يملك كل العلم فيه انت تقدر تتخصص فى كذا مجال من مجالات الشريعة بس متقدرش تقول انا متخصص فى الشريعة ككل فى عندك فقه وفى أصول فقه وفى فقه مقارن وفى علوم حديث وفى علوم قرآن ومجالات تانية أنا عن نفسى ما أعرفهاش عشان أتكلم عليها،بس لما بتيجى تتكلم عن تطبيق الشريعة الاسلامية بياخدك الكلام لجزء معين من الشريعة وهو الحدود أو تطبيق الحدود،بنظرة شاملة الحدود هى:

(الزنا،القذف،الشرب،السرقة،الحرابة،البغى،الردة)

الحدود دى اللى بيتفق عليها جمهور الفقهاء،لكن الامام ابن حزم بيخرج (البغى) من الحدود وبيدخل مكانه (جريمة جحد العارية).

فى التدوينات التالية هحاول على قد ما أقدر أديكم تعريف وتوضيح للحدود كل حد هايكون فى تدوينة خاصة بيه من ناحية تعريفه،شروطه،الأدلة عليه من(كتاب-سنه)،كيفية تطبيقه،موانع تطبيقه اذا وجدت.

التدوينة دى هاتكون مختصرة لأنى هاعرف فيها معنى الحد فقط ،وان شاء الله فى التدوينات اللى جايه هاتكلم بالعموم عن كل حد من الحدود بتعريفه وشروطه وكيفية تطبيقه ومين اللى له الحق فى تطبيقه.

الحد فى اللغة: هو المنع

اصطلآحآ:هو العقوبة المقدرة حقآ لله تعالى.

ومعنى ان العقوبة مقدرة يعنى الشرع والمشرع حدد نوعها وحدد مقدارها ومتركش اختيار العقوبة وتحديدها لولى الأمر أو القاضى بمعنى ان العقوبة مذكورة ووارده قدامك ومفيش خيار انك تسيبها وتحكم بعقوبة تانية لأنها ثابته فى القرآن والسنة النبوية المطهرة،وبالنسبة الى ان العقوبة حق لله تعالى فدا معناه ان العقوبة لا تقبل الاسقاط لا من الافراد ولا من الجماعة بمعنى انه بمجرد وقوعها وثبوتها تستوجب العقاب المنصوص عليه.

أخر حاجة أحب أقولها فى نهاية التدوينة أننا من الممكن نقول أن كل الحدود جنايات،وكل جناية ليست حد لأن من ضمن الجنايات جرائم التعازير ودى عقوباتها مش منصوص عليها وغير مقدرة.

ان شاء الله فى القريب العاجل هابتدى أول كلامى عن الحدود بحد الزنا.

حريم الجنازة

انت عامل زى حريم الجنازة.

جملة كتير مننا بنقولها وبيكون اللى بنقصده من وراها انه شغال يرغى ومابيسكتش و لفظ حريم الجنازة دا تسمعه اكتر فى جنوب مصر.

مين هما حريم الجنازة؟

حريم الجنازة دول مجموعة من النسوة اللى بتلقيهم فى كل جنازة المفروض انهم بيجو عشان يقدموا واجب العزا فى المتوفى لأهل بيته وهنا تبتدى المتناقضات،

الوحده منهم أول ما بتيجى داخل الجنازة ومن بداية الشارع أو من قبل ما تدخل المكان اللى معمول عشان يقعدوا فيه وياخدوا واجب العزا تلاقيها ترقع بالصوت الحيانى وهاتك يا صراخ وعويل على الميت لدرجة تخليك تقول ان اللى مات دا من بقية عيلتها،بالنسبه للصراخ والنواح على الميتكلنا عارفين ان الشرع حرمه وفى أحاديث عن الرسول(صلى الله عليه وسلم) بتنهى عن الكلام دا وبتصف اللى بيحصل دا بإنه دعوة من دعوات الجاهلية،بس لو جيت تقولهم الكلام ده عين ماتشوف الا النور الكل يغلطك اللى يقولك لو مصرخناش عليه يبقى كإنه مالوش أهل ومالوش عِزوة ولو مصرخوش عليه كده يبقى الميت مات فطيس والناس تاكل وشنا وياسلام على حكاية الناس تاكل وشنا هاتلاقيها تتقال فى أى موقف طب وهو أنا عشان أرضى الناس أعمل حاجة الرسول(عليه الصلاة والسلام) نهانا عنها؟ يقولولك إحنا لقينا أهلنا بيعملوها،طب هو أى حاجة لقينا أهلنا بيعملوها إحنا نعملها؟هنا يتقلب الكلام على انك قليل الأدب ومش متربى وخد عندك شوية جمل بتطلعلك من تحت الأرض تخليك تلف حوالين نفسك.

بالنسبة بقى للى بتيجى وتجامل مجاملتها بتكون بكام صرخة كدا من اللى قلبك يحبهم الصرخة الواحدة تجلجل فى الشارع من أوله لأخره فى فكرها انها كده باللى بتعمله دا بتجامل أهل الميت وبتشهل الميت بمجرد ما يطلع الكَرَب (اللى بيتشال فيه الميت) من البيت تلاقى الصراخ والعويل ابتدا وكل واحدة من حريم الجنازة بتبدع فى اللى بتقوله من عَويل و نَدب،وكل دا بيخلص بمجرد ما يروحو الجَبانة (المدافن) ويدفنوا الميت ويرجعوا بيبتدى الجزء التانى من شغل حريم الجنازة تلاقى كل مجموعة منهم واخدينلهم جنب وهاتك يا رغى وكلام فى كل حاجة وأى حاجة من سيرة الخلق لبرامج ومسلسلات وحاجات تانية كتير.

ووقت ما تسمع صراخ من جديد تعرف ان فى حد لسه واصل الجنازة بكيسه ولازم يجامل والمجاملة هنا بتكون بالصراخ والندب.

عايز أقول إن العادات والتقاليد مش كلها صح ومش أى حاجة كان أهالينا زمان بيعملوها هاتكون صح 100% ودا دليل على كلامى وربنا يصلح الحال.

مفارقات

مفارقات عحيبة بنشوفها ونسمعها الأيام دى،من بعد الثورة وكترت الناس اللى بتطلع وتقول اتظلمنا وكانوا كاتمين على انفاسنا وواكلين حقنا لكن من يومين بالظبط سمعت ولأول مرة وصف أول مرة أسمعه عن النظام السابق، على التليفيزيون المصرى والقناة الأولى بالتحديد كان فى لقاء مع قمص ودكتور من جامعة الأزهر،القمص قال وصف أول مرة أسمعه شبه مصر فى عهد النظام السابق بإنها كانت ترزخ تحت إحتلال دام 30سنة،اللى شدنى إنى أسمع اللقاء هو الوصف ده اللى قاله القمص اللى بصراحة مش فاكر إسمه ولا فاكر اسم الدكتور الازهرى اللى كان معاه،قعدت مع نفسى وقلت هل لو كان لسه النظام مسقطش كان هايطلع على التليفيزيون الرسمى للدولة ويقول الكلام اللى قاله؟ أكيد لأ طبعآ،والمدهش انه طلع وقاله على التليفيزيون المصرى اللى بيحاول يرجع مكانته اللى ضيعها بنفسه وفقد احترام الشارع المصرى ليه من مواقفه المؤسفه اللى كان بيطلع بيها مابين وقت والتانى،المفارقة التانية دى بقى كانت فى أخبار الساعة9 على القناة الأولى طبعآ محدش هايفهم معنى الكلام اللى اتقال غير اللى كان بيتابع أخبار القناة الأولى وما أدراك ما أخبار القناة الأولى وما أدراك ما القناة الأولى أصلآ القناة الأولى للى كان متابعها أيام الثورة كانت مركزه كاميراتها على النيل وبتقول ان الوضع هادى والدنيا بمبى والناس كانت بتموت فى التحرير،اللى نادوا وأهابوا بالمواطنين الشرفاء انهم يقفم جنب الجيش فى مواجهة أقباط ماسبيروا اللى خلونى أقول يراب يتحرقوا بجاز وسخ لحد أما شوفت المدرعه وهى بتعدى عليهم قلت ساعتها أنا اللى استاهل الحرق بجاز وسخ،اللى حصل ياسيدى ان نشرة الاخبار اللى كانت بتمجد فى مبارك وفى انجازات وايام مبارك قلبت360درجة وطلع مبارك ونظامه نظام فاسد نهب البلد وأفسد البلد كده مرة واحده!! طب حتى اعملوا مقدمات،مش كده خدونا وحده واحده عشان نصدق انكم هاتتغيروا مش معاهم معاهم عليهم عليهم،الأعجب بقى هو يوم 25يناير2012اللى سموه يوم الاحتفال بالثورة المصرية الثورة اللى لغاية دلوقتى مفيش حاجة من مطالبها اتحققت وياثورة ماتمت خدها الغراب وطار،جايبين واحد بيتكلم عن الثورة والاحتفال بيها وبيشبه الثورة بحرب73 وبيقول يعنى ما فى الحرب مات ناس واحنا مازلنا بنحتفل بإنتصارات اكتوبر ماشفناش حد قال نعمل عزا وميتم!!!! يا استاذى الفاصل احنا بنحتفل بانتصار اكتوبر لأنه حصل بعد حرب مابين قوتين عسكريتين مش مابين أفراد شعب واحد اللى قتلونا هما اللى المفرود يحمون،الا لو كان المقصود هو تشبيه النظام السابق بالعدو الصهيونى اللى كان محتل جزء غالى من مصر،بس فى الحالة دى كان محتل كل مصر،وأخيرآ هاسيبنى من التليفيزيون وهاتكلم على الجرايد لأ بص مش محتاجه كلام انا هانزلك صورة تغنى عن كل الكلام

وعلى رأى عمرو قطامش:

قبل الثورة إختارناه وبايعناه****وبعد الثورة قالوا لولاكى.

حكومة الدكتور الجنزورى التى يصفها بحكومة إنقاذ الثورة

إنتهى الدكتور كمال الجنزورى رئيس الوزراء المكلف بتشكيل حكومة الإنقاذ الوطنى والتى أطلق عليها لقب حكومة إنقاذ الثورة والتى تتكون من:

الدكتور حسن يونس وزير الكهرباء

فايزة أبو النجا وزيرة التخطيط والتعاون الدولي

الدكتور جودة عبدالخالق وزير التموين والتجارة الداخلية

السفير محمد كامل عمرو وزير الخارجية

السيد منير فخري عبدالنور وزير السياحة

الدكتور عبدالله غراب وزير البترول

فضيلة الدكتور عبدالفتاح القوصي وزير الأوقاف

السيد محمود عيسى وزير الصناعة

الدكتور على صبري عويضة وزير الدولة للإنتاج الحربي

الدكتور محمد عبدالقادر سالم وزير الاتصالات وتكنولوجيا المعلومات

والدكتور هشام قنديل وزير الري

والدكتور محمد فتحي البرادعي وزير الاسكان

السيد جمال محمد العربي وزير التربية والتعليم

الدكتور فتحي فكري وزير القوى العاملة

الدكتور شاكر عبدالحميد وزير الثقافة

الدكتور ممتاز السعيد وزير المالية

الدكتور حسين مصطفى موسى، وزير التعليم العالي

الدكتور سعد نصار وزير الزراعة

الدكتور محمد إبراهيم على وزير الآثار

الدكتورة نجوى خليل وزير التأمينات

اللواء أحمد أنيس وزير الإعلام

الدكتور جمال مصطفى السعيد وزير النقل

الدكتور فؤاد النواوي وزير الصحة

المهندس حسين مسعود وزير الطيران المدني

المستشار عادل عبد الحميد وزير العدل

الدكتور نادية زخاري وزيرة البحث العلمي

والدكتور مصطفى حسين كامل وزير البيئة

.وزير الداخلية ******

وردآ على سؤال حول من هو وزير الداخلية الجديد؟

قال الدكتور كمال الجنزوري أنه سوف يتم الإعلان عن اسم وزير الداخلية عند حلف اليمين،لافتا الى انه لا بد ان يتركز خدمة وزير الداخلية الجديد في المجال الجنائي.

وأشار الجنزوري خلال مؤتمر صحفي عقد الثلاثاء أنه كان على رأس أولويات اهتمامته مع الوزراء المكلفين قانون الضريبة العقارية وقانون التأمينات الاجتماعية، مؤكدا على أنه لابد أن يعدل القانون لتحقيق المساواة، مشيرا إلى أنه من مهام الحكومة الجديدة تثبيت 500 ألف موظف.

ولفت الجنزوري إلى أن هناك مساعدون للوزراء من الشباب في قطاعات الصحة والزراعة والبترول والصناعة والرياضة.

وبذلك يكون التشكيل الوزارى الجديد قد تضمن15وزيرآ جديدآ و12وزيرآ من وزارة الدكتور عصام شرفرئيس الوزراء السابق،فى حين لايزال فى هذه الوزارة أقدم وزيرين فى التشكيل الوزارى الجديد وهم الدكتور حسن يونس،وفايزة أبو النجا وهما من حكومة رئيس الوزراء الأسبق الدكتور أحمد نظيف.

شئ من الخجل!!

كانت حكمة والدى تقول:

قد تختلف وجوهنا من شخص الى اخر

فى اللون والحجم والعيون

لكننا وجه واحــد فى عـيــون ابن صهيون

يا أيها البطل فى وجه من ترفع سلاحك؟

فى وجه عدو إستباح الارض واستباحك؟

ام فى وجهه من جراحه هى نفس جراحك؟

فى وجه من ترفع سلاحك؟

ياكنزنا المكنون يامقلة العيون

الهذا الحد وصلنا؟

او ليس القتل جنون؟

ياأيها البطل فى وجه من ترفع سلاحك؟

هل نسينا ان دم المسلم على المسلم حرام؟

هل نسينا ان المسلم عند المسلم لا يضام؟

أهذه وصية الحبيب محمد صلَّ الله عليه وسلم؟

قتل الصديق؟

وذبح الحمام؟

والله حــــــــرام!!!

افيقوا!!!

إستيقظوا!!!

قوموا يانيام!!!

أنتم تذبحون بعضكم

وغيركم فى احضان العهر ينام

على من ترفعون السلاح

على الصابرين؟

على الجائعين؟

على الصامدين المرابطين؟

ام على من شردنا وضيعنا منذ سنين؟

على من ترفعون السلاح ؟

إسرائيل اليوم فى عيد

وموتنا هو الخبر السعيد

مادام ييتم فينا الوليد

ونذبح من الوريد الى الوريد

سامحنا ياجريح

راح الذى من أجله جرحت

شئ من الخجل......شئ من الخجل

أم انكم ما عدتم تخجلون

فى وجه من ترفعون السلاح

مش هانحكى فى المحكى!!

حزب الحرية والعدالة هو حزب أسسته جماعة الإخوان المسلمين بمصر، ودخلوا بيه الانتخابات البرلمانية المصرية2011 فى مايطلق عليها عُرس الديمقراطية وبرلمان الثورة.

فى ناس مش قليلة بتكره الإخوان المسلمين عشان كده هاتلاقيهم ضد حزب الحرية والعدالة على طول الخط ، فى ناس بتنتقض الحزب نفسه ورافضاه وبتقول فى رفضها انه يقوم على أساس دينى وده مرفوض ويتم على خلاف ما هو معلن فى الإعلان الدستورى لمصر مابعد الثورة ، فى ناس بتقول على الإخوان المسلمين إنهم إنتهازيين وبتوع مصلحتهم وممكن يبيعوا البلد لو ده فى مصلحتهم.

انا مش مع ولا ضد الإخوان المسلمين الإخوان المسلمين هم جزء من المجتمع المصرى ولهم كافة الحقوق اللى بيتمتع بيها المواطن المصرى وعليهم كافة الواجبات اللى على المواطن المصرى ، مش هاتكلم على انهم كانوا مظلومين ودايمآ ياهربانين أو فى المعتقلات فى عهد النظام السابق ، مش هاتكلم على ان كمية كبيرة من الظلم اللى كانت فى عهد النظام السابق كانت بتنصب عليهم لأن ده هايكون كإننا بنحكى فى المحكى وأنا مش هاعمل كده.

انا لا هادافع عن الإخوان ولا حاهاجمهم، البعض بيخلط بين الإخوان المسلمين وبين الإسلام وبيصوروا ان الإخوان هما اللى بيمثلوا الإسلام وده غلط،الإخوان المسلمين هم جزء من الإسلام وليسوا هم الإسلام والجزء لايمثل ولا يتحدث بلسان الكل.

كلامى هنا هايكون عن محادثة أو مناقشة تمت قدامى بين ولد وبنت فى واحده من غرف المحادثة على برنامج النيمبز(nimbuzz) كان الكلام قدامى وبصراحة لقيت الولد بيتكلم بسطحية او زى مابيقولوا حافظ مش فاهم ساب كل الانتقادات الى بتوجه للإخوان ومسك فى حاجة وطلع كمان مش عارف يتناقش فيها ، اتكلم عن ان الإخوان لو مسكو مصر هايطبقوا الحدود الشرعية؟واستشهد على ده بحد السرقة وحد الزنا وكان كل كلامه فى الحدود عن الحدين دول وبس، واللى أثبتلى انه مش عارف بيتكلم عن ايه بالظبط لدرجة ان البنت بتقوله ان فى سروط لتطبيق الحدود انت عارفها؟ كان رده الوحيد عليها هو انا لازم أكون عارف الشروط عشان ابقى مسلم!!!!

قمة السطحية إنك تفتح موضوع ماتعرفش أى حاجة عنه وكمان تقاوح وتعمل فيها إمام عصرك وأوانك.

وفى نص الكلام قام فاتح موضوع حد الزنا، طب حد الزنا ده لوحده فى الشرع عشان يثبت لازم يستشهدوا ب4رجال عدول شهادتهم ماتكونش مجروحة ويقسموا بالله انهم شافوهم فى الوضعية الزنا(كرؤيتهم دخول المرود فى المكحلة) طبعآ المعنى واضح ومفهوم، ولكن بردوا الأخ لما سألته البنت انت عارف شروط الحكم بحد الزنا قعد يلف ويدور فى الكلام ويفتح مواضيع تانية ويقولها انتى اللى مش عارفة تردى عليا وفى الأخر قام قايللها دول هايلبسوكى نقاب!!!! هايتدخلوا فى حريتك الشخصية!! هل هاتقبلى بده؟ مش هاتعرفى تلبسى لبس قصير من تانى!! طب لو انت مكانى هاتضيع وقتك فى الرد على واحد زى ده؟ واحد بيفتح مواضيع وهو مش عارف أى حاجة فيها ولا يقدر يتناقش أو يتكلم فيها لمدة خمس دقايق على بعض؟

للأسف الشديد عدد مش قليل من الشعب المصرى مايعرفش عن دينه غير الصلاة والصوم والحج والزكاة أه انت مش مطالب بإنك تكون عالم بكل امور الدين ماخفى منها وماظهر بس على الأقل تكزن عالم بأبسط الأمور اللى بتكون عايز تتناقش فيها.

انا هنا مش فى موضع انى اتكلم عن الحدود الشرعية وشروطها وضوابط تطبيقاتها لأن ده موضوع يطول الكلام فيه وانا ان شاء الله هاحاول على قد ما أقدر إنى أكتب مواضيع تانية عن الحدود فى الشريعة الاسلامية،كل اللى كنت عايز أتكلم فيه هنا هو عن المناقشة اللى دارت مابين الولد والبنت قدامى، وفى النهاية الولد قال إنه لسه مجاش معاد إنتخابة ممكن ينتخب الإخوان المسلمين لو إقتنع ببرنامجهم الإنتخابى.

وزى ماقلت انا لابدافع عن الإخوان ولا بانتقدهم،وبردوا لازم أأكد ان الإخوان المسلمين مش هما بس اللى بيمثلوا الإسلام لأ هما جزء من كل.

تحالف الثورة مستمرة

تحالف الثورة مستمرة هو تحالف تم بين ( ائتلاف شباب الثورة - الحزب الاشتراكى المصرى - حزب التحالف الشعبى الاشتراكى - حزب التحالف المصرى - حزب التيار المصرى - حزب المساواة والتنمية - حزب مصر الحرية ) شعارهم ( أمن - حريه - عداله اجتماعيه ).

طب ليه تحالف الثورة مستمره؟

لأنهم ماعملوش زى غيرهم ووعدوا بوعود مايقدروش ينفذوها يعنى ماقالوش هانبنى مسان ولا هانشغل الكل ولا هانأكلكم عيش وأومليت ولا أى كلام من ده دول فاهمين وعارفين ايه هى وظيفه عضو مجلس الشعب القادم.

مش هاكتب ولا هاتغنى بيهم أنا هاسيب اللى عايز يعرف برنامج التحالف ينزل الكتيب الصغير ده اللى هو عن برنامج التحالف الانتخابى لمجلس الشعب 2011.

إضغط لتحميل البرنامج الانتخابى لتحالف الثورة مستمره

فضائل يوم عرفه

هو يوم من الأيام المباركه فى تاريخنا الاسلامى،فيوم عرفه هو أحد ايام الاشهر الحرم(ذوالقعده-ذوالحجه-محرم-رجب)، وهو أحد ايام أشهر الحج لقوله تعالى(الحج أشهر معلومات){سورة البقرة:197} وهو أحد الأيام المعلومات التى أثنى الله عليها فى كتابه الكريم وهى عشر من ذى الحجه طبقآ لابن عباس رضى الله عنهما،وهو أحد الأيام العشر التى أقسم اله بها منبهآ على فضلها، فيه أكمل الله لنا ديننا وأتمم علينا نعمته يقول تعالى(الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمْ الْإِسْلَامَ دِينًا){سورة المائدة:5}،وهو أحد الايام العشره المفضله فى أعمالها على غيرها من أيام السنة قال النبي صلى الله عليه وسلم : (ما من عمل أزكى عند الله - عز وجل- ولا أعظم أجرا من خير يعمله في عشر الأضحى قيل: ولا الجهاد في سبيل الله - عز وجل- ؟ قال ولا الجهاد في سبيل الله - عز وجل- إلا رجل خرج بنفسه وماله فلم يرجع من ذلك بشيء) رواه الدارمي وحسن إسناده الشيخ محمد الألباني في كتابه إرواء الغليل،اختصه الله تعالى بأن جعل صيامه لغير الحاج يكفر به سنة ماضيه وسنة مقبله وأما الحاج فلا يسن له صيام يوم عرفه لأنه بالنسبه له يعتبر يوم عيد بالإضافه ليوم النحر وأيام منى،قال عنه الرسول صلى الله عليه وسلم(خير الدعاء دعاء يوم عرفه)،يكثر فيه العتق من النار،يباهى الله به أهل السماء،فيه ركن الحج الأعظم لقوله صلى الله عليه وسلم(الحج عرفه).

فضائل كثيره فى يوم عرفه ذكرت منها ماسبق،

اللهم أكتب علينا زيارة بيتك الحرام ووقوفنا بعرفه،اللهم أغفر لنا ماتقدم من ذنبنا يارب،اللهم تقبل منا صالح الأعمال، اللهم توفنا وأنت راض عنا يا أرحم الراحمين.