كاتب لبكره جواب

سجادة مفروشة..

نايم عليها الوف..

الدَب ببيادة....قطع حبال الصوف..

مستورة....أنا كداب ....ما أنا خايف أتألم..

الضرب بالقايش فى عقولنا أهو معلم..

موجود.....ومش موجود..

عايش بدون صوتى...

ضحكولى سامعينك...بيشتروا موتى..

دى بلاد ماتسمعشى...

فجوابى دا نعشى...

أنا كاتب لبكره جواب .... وخايف مايوصلشى...

ماهو الكلام فى بلدنا... يقطع مايوصٌلشى...

خايف ماتفهمشى....

وتقول بعيد هامشى...

دا أنا لابس قميص من الهم إسود ماينضفشى...

القطن صنع بلادى... لكن مايسترشى...

**************************

كاتب لبكره جواب خايف مايكملشى....

أصل الأعمار بيد الله....

وانت ماتضمنشى...

العمر يخلص إمتى؟

ليه مابتندمشى؟

المال الحرام .... يقف فى البطن ... مايتهضمشى..

أصل الجوع يخلى الحجر ينطق..

لما تكون ماشى على رجلك... واللى جنبك بيسحف بيشحت..

طب إسمع وإضحك؟

لما أقول للوحش فى وشه إنت وحش؟

أبقى بجح!!!!!

ولما أغش فى الدرا؟؟؟

يقولوا الشاطر نجح!!!!!!

شعوب ... بتتفضح ..

أبواب مش عايزه تتفتح..

شوف فى كام حضارة..قربت تتمسح!!

************************

كاتب لبكره جواب...

يوصل مايوصلشى...

مش فارقة معايا كتير..

ما أنا كده كده هامشى...

ده لو (أيوب) جه هنا على العيشه مايصبرشى....

لو قالوا أقعد يوم؟

بصراحة ما أقدرشى...

خلينا كده نايمين..

خلينا كده نايمين .. نقعد مابنقومشى..

مع إن حب بلادنا يكبر مايصغرشى...

حتى وأنا جواها..

حتى وأنا جواها..بردوا بتوحشنى..

حرقت نفسى بنار... النار ماتحرقش..

وبعد كل ده.. بيقولوا بتضحكلى؟؟!!

طب أفضل فى وطنى أسير؟؟؟

ولا أسيب بلدى؟؟؟

وعجبى!!!!

لو عايز تشوف الكلام اللى فوق فيديو اضغط على الرابط ده:

http://www.youtube.com/watch?v=6uzPQgbyfR8