الفهيم اللئيم:
لقب بنطلقه على بعض الأفراد فى مجتمعنا ممكن يتوصفوا بأوصاف كتيره غير الوصف ده يعنى ممكن تلاقي الواحد منهم بيتوصف بإنه(سُهُن)او (ميه من تحت تبن) أو (الخبيث) أو(المكار)(مش التعلب المكار اللى كنا بنقرا قصته واحنا صغيرين)وبتتعدد الألقاب بتعدد الأماكن والمجتمعات والأفراد كلامى عن الفهيم اللئم مابقصدش بيه حد معين خالص ده كلام عام على الأفراد اللى بيتصفوا بالصفة دى.
ليه الفهيم اللئيم؟
بصراحة كتروا فى زماننا الاشخاص اللى بيتصفوا بالصفة دى والصفة دى صفة خطيرة جدآ لأن من العمايل اللى بيعملها ممكن يخرب الدنيا ويقعد كإنه ملاك ولا كإنه عمل حاجة خالص ويظهر بمظهر الملاك المنقذ اللى يجيلك عشان يساعدك بأى طريقه ممكنه مع انه هو اللى مورطك وهو السبب فى كل اللى انت فيه.
بس المشكلة مش فى الجزء الأول اللى هو(الفهيم) مش مشكلة انه يكون (فهيم) بيفهم الكلام او زى مابنقول (بيفهمها وهى طايرة) كل المشكلة فى الجزء التانى من الصف اللى هو(لئيم) وبصراحة لما بتتجمع الصفتين فى شخص واحد(الفهيم اللئيم) قابل على اللى هاتشوفه من تحت راسه بيبتدى بقى الشغل اللى على اصوله شوية (اللوئم) اللى عنده بيطلعهم بس بيقعد يخطط ويحسب ويتكتك وينفذ على نار هادية،وغالبآ تخطيطه بينجح لأنه بيعتمد على المجتمع اللى حواليه اللى بياخد بالمظاهر فاكرين فيلم(رصيف نمره 5) بتاع فريد شوقى وزكى رستم ؟ أهو زكى رستم فى الفيلم كان الفهيم اللئيم:)
شوفتوا كان بيعمل ايه فى الفيلم؟
شوفتوا الناس كانت بتبصله على انه إيه؟
تخيل بقى ان فى شخصيات زى كده فى حياتنا لا وكمان أمر وأتعس منه،الصفة دى لو لاقيتها فى انسان نصيحة منى ليك ابعد عنه خالص.
ليست هناك تعليقات:
إرسال تعليق