لماذا نطالب بقانون العزل السياسى؟

لماذا نطالب بقانون العزل السياسى؟

كتر الكلام فى الاول عن المطالبة بتطبيق قانون الغدر لكن من المنحنى اللى واخداه الامور فى طريقها ظاهر جدآ ان قانون الغدر مش هايطبق فأضعف الايمان نطالب بتطبيق قانون العزل السياسى وأعتقد اللى ماعملش حاجة غلط مش هايخاف من تطبيق القانون ده.

قانون العزل السياسى بيه هانقدر ننحى القيادات اللى افسدت فى الدولة من أصغرها لأكبرها والقانون ده ش بنطالب بيه مدى الحياة ده كل اللى بنطالب بيه تنحيتهم لمدة5سنين بس مش أكتر ومقالناش اننا هانحاكمهم ولا طالبنا بده كل اللى طالبينه ان المشئول اللى افسد او استخدم منصبه لمنفعة شخصية ليه يتم منعه من مزاولة حياته السياسية لمدة5سنين بمعنى انه مايترشحش ولا يشغل اى منصب قيادى فى الدولة ولا يكون عضو مجلس شعب أو شورى ولا عضو فى مجلس الوزراء يتفضل يقعد معزز مكرم فى بيته الفترة الانتقالية دى اللى هى لمدة5سنين وسيبوا البلد للناس اللى ما أفسدتش ولا بوظت سيبوها للناس اللى عايزه تنضف البلد.

الكل بيطلع على التليفيزيون يتغنى ويمدح فى الثورة وشباب الثورة وانهم خلصوا البلد من فساد وظلم استمر على مدار سنين محدش منهم كان قادر يقول لأ قبل كده والكل عارف اللى كان بيقول لأ كان مصيرة بيكون ايه ،طيب طالما الموضوع كده وانتم شايفين ان الشباب دول خايفين على البلد بالطريقة دى طيب حضراتكم استريحوا شوية وادوا فرصة للشباب انهم يحاولا يخدموا البلد،ادوهم فرصة انهم يبينولكم هما يقدروا يعملوا ايه،ادوهم فرصة يحاولا يصلحوا البلد اللى باظت فى وقت ما (البعض منكم) كان قاعد على الكرسى وشايف وساكت كان كل همه ازاى يكون ثروة من قوت الشعب ازاى هو يعيش والباقى مش مهم مايلاقيش حتى حق رغيف العيش ناس مكانش حيلتها غير مرتبها دخلت المنصب وطلعت منه وهى معاها ملايين لا تحصى وكله من فلوسى وفلوسك أخدوا حقى وحقك وعملوه حقهم طب دا انت لو حتى حاولت تعمل حاجة للبلد وفى نفس الوقت حاجة لنفسك كانت الناس هاتسكت وتقول طالما بيعمر او بيعمل لصالح البلد مش مشكلة خليه بردوا يبص لمصلحته ده طباخ السم بيدوقه،انما للأسف مكانش ده بيحصل كان بيبص لمصلحته هو وبس وظز فى البلد تتحرق بجاز وسخ انا مالى هو انا اللى هاصلح البلد؟ ايوه طبعآ انت اللى هاتصلح البلد لأن البلد دى ليا وليك ولأولادى ولأولادك البلد دى ايه غيرنا لو احنا ماحاولناش نصلح حالها مين اللى هايصلحوا؟ هانستوردلها ناس من برا يجو يصلحولنا ويمشوا؟

كانت الفرصة قدامك لنك تصلح البلد بس للأسف استغليت الفرصة فى انك تكوش على حق البلد وتخليه حقك انت.

وبعد كده تزعل لما نقول عايزين قانون العزل السياسى؟

طب بتزعل ليه لو انت كنت ماشى سليم؟

ولا هو اللى على راسه بطحه!!!

البلد مش مستحمله فساد ونهب وسرقه البلد قالت كفاية انا فاض بيا

كفااااااااااااااااااااااااااااية انا فيا اللى مكفينى

عشان كده بقولك انا عن نفسى عايز قانون العزل السياسى وده مش غلط ولا ضد الديموقراطية والحرية ، لأ أبدآ انا عايزه عشان اعرف ابنى (بلدنا) كويس وأبنيها من الأساس ويكون أساسها سليم وبعد كده يامرحب بيك تشاركنى فى البلد وتاخد حقك وكل مواطن ياخد حقه ومايزيدش عن حقه لو انت ماشى سليم عمرك ماهاتكون ضد قانون العزل السياسى انما بقى لو انت غير كده فأكيد هاتحاول بأى طريقة ان القانون ده مايصدرش.

خلونا نبنى البلد ادونا فرصة نبنى البلد بجد وعلى حق انتم أخدتم فرصتكم وضيعتوها وضيعتونا وضيعتوا البلد معاكم

واحنا مش هانسمح بده يحصل من تانى مهما كان التمن.

عشان كده أنا مع قانون العزل السياسى.