طبعآ واضح من العنوان ان اللى هاكتبه المره دى عبارة عن شوية مواضيع هايتحطوا فى موضوع واحد،
إزاى ماعرفش بس أدينا هانجرب.
1-حملة ترشيح المشير للرئاسة:
بصراحة الراجل من حقه يترشح كمواطن مصرى زيه زى أى مواطن عادى.
بس هو مش كده هايكون مرشح المؤسسة العسكرية؟
وبعدين مش قالوا قبل كده انه مفيش أى مرشح للمؤسسة العسكرة فى انتخابات رئاسة الجمهورية؟
طب ايه الكلام اللى بنسمعه ده؟
هل هو فعلآ هايرشح نفسه؟
طب هل الناس هاتديله اصواتها؟
طب لو مش هايرشح نفسه ايه اللى خلاه ينزل الشارع ببدلة مدنية(مع ان ده من حقه)؟
شكل الموضوع ده كله مليان علامات استفهام كتيره وللأسف الشخص الوحيد اللى عنده الإجابات هايفضل ساكت ومش هايقول ولا كلمة.
2-حزب التحرير:
قريت من يومين انه تم تقديم اوراق اول حزب شيعى فى مصر للجنة الأحزاب وتم قبولها،فألف مبروك للمصريين وعقبال البهائيين مايعملولهم حزب وكمان القرأنيين وأى حد تانى ماهى ظاطت وكله بيظيط يعنى هى جات عليهم،وكلها كام سنة ونقول يااااااااااااااااااااااااااااه فاكر زمان لما كنا بنقول على مصر دى بلد الأزهر؟
وسلملى عالأزهر.
للأسف كل ده بيقسم البلد وكلها كام سنة ونبقى زى العراق وده اللى هما عايزينه،عايزينا نفضل نتحارب مع بعضينا ونفضل ننتقل من تخلف الى تخلف أكتر ولا نبص لمصلحة البلد ولا نحاول نبنى البلد ونقويها ونخليها أفضل من ما كانت عليه ونرجع مكانتها من تانى.
3-طالبنا بقانون الغدر أو العزل قالولنا قانون التحويل بين الأديان:
دى بقى حاجة تحرق الدم بجد وأى حد بجد دمه هايتحرق منها من أول ما قلنا ياثورة قلنا لازم نحاسب الناس اللى افسدت مصر الكبار والصغيريين دورنا عندنا لقينا حاجة زمان عملها جمال عبدالناصر الله يرحمه اسمها قانون الغدر طالبنا بتطبيقه (مع العلم ان القانون ده شغال لحد دلوقتى ومتلغاش) قامت الحكومة مشكورة حلقتلنا فيه ومش عايزه تطبقه (وعندهم حق ازاى يطبقوا بقانون اول ما هايحاسب هايتحاسبوا هما بيه) ولما لقبنا الكلام ده قلنا طب نطبق قانون العزل السياسى وأهو أضعف الايمان الحكومة مش حلقتلنا بس لأ دى عملت ودن من طين وودن من عجين ونفضتلنا أحلى تنفيضه.
قوم ايه بقى نفاجأ بسيادة المستشار أحمد رمزى مستشار رئيس مجلس الوزراء بيصرح لجريده التحرير الى ان هناك نية للحكومة الى اصدار قانون ينظم التحويل بين الأديان بالقانون وعايز يلغى ان الازهر والكنيسه هما المنوطين بالكلام ده ويخلى اللى عايز يتحول من دين الى دين يتحول بالقانون والمؤسستين الدينيتين(الأزهر والكنيسة) مالهمش أى دخل فى الموضوع ده وخد عندك بقى كمية الفتن والمشاكل اللى هاتحصل من ورا القانون ده لو صدر.
ليست هناك تعليقات:
إرسال تعليق