صوتك أمانة .. عارف يعنى ايه صوتك أمانة؟
يعنى صوتك مايروحش غير للى يستحقه بغض النظر عن صلة القرابة ولا انه أحسن الوحشين ده لو عايزين نبتديها صح
انما لو عايزين نقضيها مصالح وظبطنى وأظبطك أو نمشيها بالفلوس يبقى انا اللى هانجنى على نفسنا واحنا اكيد لسه فاكرين اللى نجح بفلوسه لما نجح قال ايه!!
المهم صوتك أمانة صوتك هايفرق فى الانتخابات اللى جايه صوتك ممكن يرفع البلد وممكن يخسفها لسابع أرض المجلس اللى جاى سواء كان مجلس شعب أو شورى عليه مهام كتيره هايقوم بيها أولها اعادة كتابة دستور جديد للبلاد دستور هانكمل بيه الى ان يشاء الله.
عضو مجلس الشعب أو الشورى اللى جاى مش هايروح يقبض وبس أو هايروح يقول الجملة الشهيرة(موافقون موافقة) لا دا هايكون عليه تلال من الحمول اللى من الممكن لو هو مش قدها يورطنا احنا والبلد وفى اللحظة دى مش هانلوم غير نفسنا ومنقدرش نلوم غيرها لأننا اللى هانكون نجحناه لازم العضو اللى ننجحه مايكونش ضعيف ولا طيب زيادة عن اللزوم ولا بتاع مصلحته ولا اللى يتمسكن لحد مايتمكن، عضو مجلس الشعب او الشورى اللى جاى لازم يكون قوى عنده شخصية مش بيمشى بالريموت ولا ممسك دقنه لحد بيشده وهو وراه لازم يكون عنده علم بمشاكل الدايرة اللى هو بيمثلها عشان مانجيش بعد كده ونقول أهو معملش حاجة ولازم يعرف ان الناس مش هاتسيبه هاتفضل وراه طالما كان على حق وهاتقف فى وشه طالما بعد عن الحق وبص لمصلحته الشخصية بس ومش مهم البلد واللى فيها.
كتر الكلام فى الفترة اللى فاتت عن الماضى على أساس من لاماضى له فلا حاضر له بس بردوا ماينفعش فى كل حاجة نقعد نتغنى ونبكى على أطلال الماضى لأن اللى دايمآ يقول زمان عمره ماهيكون له مستقبل فخلينا نسيب الماضى ونبص للمستقبل لأن الماضى خلاص انتهى وعلى رأى الست (أم كلثوم):
عايزنا نرجع زى زمان
قول للزمان ارجع يازمان
وده طبعآ مستحيل انك تقدر ترجع الزمن.عايزين نبص قدامنا مش تحت رجلينا إطلع برا الدايره وبص وشوف ايه اللى بيحصل وبعدين قرر مين الأصلح مين اللى هايخدم البلد بجد مش مين اللى هايجيبلك قطعة أرض أو شقة أو اللى هايخلصلك ترخيص عربيتك أو يطلعلك ابنك من القسم لو طلعلك انهارده بكره هاينفضلك ولا كأنه يعرفك،فياريت تختار صح لأن اختيارك مش حاتقدر تلوم أى حد عليه غيرك.
أبسطهالك أكتر بص على الصورة دى وانت تقرر الصورة دى عاملاها حركة شباب6ابريل(سواء اختلفت أو اتفقت معاها دى حاجه ترجعلك) الصورة دى اسمها الدايرة البيضة والدايرة السودا بكل بساطة حاطينلك صفات المرشح اللى المفروض تختاره فى الدايرة البيضا وصفات المرشح اللى اللى مش ممكن تختاره(لو عايز البلد تتحسن) فى الدايرة السودا ودى الصورة:
ليست هناك تعليقات:
إرسال تعليق